سه‌ڵاح کوڕه‌ کوردێکی ده‌نگخۆش و ئارام و که‌مدوو، ده‌نگێکی سازگاری کوردیی که‌وه‌ک بۆنی هه‌ڵاڵه‌و شۆره‌بی و مۆرد و ناو ره‌ز و بنه‌ چیخ و مێگه‌ل و رانه‌ مه‌ڕ و هاڵاوی گه‌رمی نانی سه‌ر ته‌نوره‌ بۆنی مێخه‌ک و سمڵی شۆڕه‌ کچانی دێی و ساتی قریوه‌یانه‌...، سه‌ڵاح ئه‌و ده‌نگه‌ خۆرسکه‌ خواییه‌ی که‌ روونه‌ وه‌ک چاوگه‌کانی زه‌ڵم وئاویده‌ر ..گه‌رمه‌ وه‌ک لانکه‌ی مندالانی دێ.. پڕشه‌رمه‌ وه‌ک عیشوه‌و نازی دڵدارانی رێی کانی، به‌ئازاره‌ وه‌ک خه‌می کورد و پڕ حه‌سره‌ته‌ وه‌ک سه‌داو زایه‌ڵه‌ی له‌یلایه‌ی دایکانی پڕ چاوه‌ڕوانی، جار جار تووڕه‌شه‌ وه‌ک ناخی هه‌مووان ..

سه‌ڵاح ده‌نگی دوارۆژه‌ و به‌ته‌نها کوڕی سنه‌ نییه‌،، ئه‌و گه‌رووی ئێمه‌ی کورده‌ له‌ هه‌موو لایه‌ک، هی سلێمانی و ئامه‌د و مه‌هاباد و قامیشلۆیه‌، هه‌ولێرو دهۆک و گه‌رمیان وکویستانی ئه‌م خاکه‌ زامداره‌و سوتماکه‌یه......‌